全職炒股

我見咁多人問全職炒股好唔好, 我已經全職炒左幾年, 見悶悶地, 等我呢位過來人分享下經驗
因為我本身在一間行內有名的證券行打工, 跟到位好師父, 之後轉全職先至行到條生路
但係一般人想全職炒股真係要三思


首先先講下我既見聞, "全職" 炒股通常得呢三種結果 (一邊打工逗份糧一邊炒股唔計)
1) 炒來炒去得個桔, 佔70%, 同打工無分別, 可能仲衰, 三更窮, 四更富
2) 輸到起身甚至破產 20%
3) 炒到發達 (幾千萬至過億) 10%

第1)或第2)類人都冇乜好講,
大家應該最有興趣第3)類

主要係5類人, 呢5類人我都認識, 都係舊公司的同事老闆, 客和同行戰友
1) 靠堅料, 主要識得人多 network勁, 由中港政府,上市公司, 下至大行盤都收到料
2) 玩財技, 呢D要埋到堆先有得做, 一般人都唔洗諗
3) 靠睇盤路和超高槓桿, 主要都係短炒, 身家通常都係維持幾千萬左右, 因為風險大, 一跌就斬,  好難炒到上億 (呢類佔最多)
4) 基本分析(由政治至行業至公司每一個細節都深入分析), 呢D最發, 因為肯坐盤, 跌到PK都有信心接, 財富亦最持久(因為方法持之有效, 財富可以複式增長), 但亦最辛苦
5) 睇圖表發達, 咁多年只見到一個....真係萬中無一

以上都係粗略分類, 通常成功炒家以上樣樣都會利用, 只係睇邊種比重高D

而小弟跟的師父就係主要用基本分析. 我由打工至自立全職炒(都在同一間公司做), 每日基本上都係早5晚1
每 天工作流程都係一起身看各大報紙, 公告, 報告...開市時就主力炒(同時睇網站,公告,報告, 有時就會去業績會,參加分析員電話會議, 公司的road show.........跌吉都係我其中找idea的地方), 收市至1點又係睇新聞公告報告, 如果有機會就會猛公司的分析員的衫尾去見管理層或者site visit(自費)

我全職炒呢幾年, 因為得自己一個工作, 未試過放假, 就算發燒都無得放假, 假期都係睇報告......
雖然小弟有排未發達, 但託賴係呢幾年都供斷層樓, 暫時唔驚餓死冇屋住, 但係離目標仲係好遠好遠....

好啦, 我又要返去工作了.....


==============
後記


今天夠了, 這只是一天期限的account

其實我的工作和如何賺錢均不是重點, 當吹水也沒關係....

只希望大家想想自己全職後有沒有能力維生
對我來說全職炒股是一條不成功便成仁的不歸路
萬一行錯要回頭, 便會發覺炒股期間並無任何得著, 後悔枉花掉人生最黃金的時期

祝大家好運